Blog Archives - telugutaruni.weebly.com

ఎగ్‌ పరోటా

6/28/2013

కావలసిన పదార్థాలు:
పరోటా : రెండు
జీరా, ఉప్పు, మిర్చిపొడి : సరిపడా
రిఫైండ్‌ ఆయిల్‌ : సరిపడా
గుడ్లు : 2
సన్నగా తరిగిన ఉల్లిపాయ ముక్కలు : అరకప్పు
టమోటా ముక్కలు : అరకప్పు
మిరియాల పొడి : అర టీ స్పూను
ధనియాల పొడి : అర టీ స్పూను
పసుపు : పావు టీ స్పూను
కొత్తిమీర తురుము : రెండు టేబుల్‌ స్పూన్లు

తయారు చేసే విధానం:

ముందుగా కడాయిలో నూనె వేడి చేసి జీరా, ఉల్లిపాయ, టమోటా ముక్కలు వేసి దోరగా వేగ నివ్వాలి. తర్వాత రెండు పరోటాల ముక్కలను వేసి వేయించాలి. మిర్చిపొడి, ఉప్పు, పసుపు, మిరియాల పొడి, ధనియాల పొడి వరుసగా వేసి సన్నని సెగపై ఉడికించాలి. గుడ్ల సొనను చిలి కి కడాయిలో పోసి కలపాలి. గుడ్లు పూర్తిగా ఉడకనిచ్చి పైన కొత్తిమీర తురుము చల్లి వేడి వేడిగా సర్వ్‌ చేయొచ్చు. ఎగ్‌ పరోటాకు చిల్లీ సాస్‌ లేదా టమోటా సాస్‌ను సైడ్‌ డిష్‌గా సర్వ్‌ చేసుకోవచ్చు.

స్పైసీ వెజిటబుల్ టోస్ట్

6/27/2013

కావలసిన పదార్థాలు :
బ్రెడ్ స్లైసులు - 4
బంగాళదుంపలు - 4 (మరీ మెత్తగా కాకుండా ఉడికించాలి)
ఉల్లితరుగు - పావు కప్పు
క్యాప్సికమ్ తరుగు - పావు కప్పు
టొమాటో తరుగు - పావు కప్పు
కారం - అర టీ స్పూను
చాట్‌మసాలా - అర టీ స్పూను
ఉప్పు - తగినంత
అల్లంతురుము - టేబుల్ స్పూను
పచ్చిమిర్చి తరుగు - టేబుల్ స్పూను
కొత్తిమీర తరుగు - 2 టేబుల్ స్పూన్లు
నూనె - వేయించడానికి తగినంత

తయారుచేసే పద్ధతి:

ఉడికించిన బంగాళదుంపలను ఒక పాత్రలో వేసి, మెత్తగా చేయాలి.
మిగిలిన కూరముక్కలు, మసాలా దినుసులు, పచ్చిమిర్చి, కొత్తిమీర వేసి మరోమారు కలపాలి.
ఒక బ్రెడ్ స్లైస్ తీసుకుని గు్రండంగా, దీర్ఘచతురస్రంగా లేదా చతురస్రంగా ఒక్కో స్లైసుని నాలుగు ముక్కలు గా కట్ చేసుకోవాలి.
తయారుచేసి ఉంచుకున్న మిశ్రమాన్ని బ్రెడ్‌కి రెండువైపులా ఉంచి చేతితో గట్టిగా అదమాలి.
నాన్‌స్టిక్ పాన్‌ను స్టౌ మీద ఉంచి వేడి చేసి, నూనె వేసి కాగాక, బ్రెడ్ స్లైస్ వేసి రెండువైపులా కాల్చాలి.

మూలం : సాక్షి దినపత్రిక

సొరకాయ తెప్లా

6/26/2013

కావలసిన పదార్థాలు
సొరకాయ తురుము - ఒక కప్పు,
గోధుమపిండి - ఒక కప్పు,
పచ్చిమిర్చి (సన్నగా తరిగి)- ఒకటి,
ఉప్పు -ముప్పావు స్పూన్,
నూనె -ఒక టీస్పూన్,
కొత్తిమీర తురుము - ఒక టేబుల్ స్పూన్,
కసూరి మెంతి - ఒక టేబుల్‌స్పూన్,
కారం - పావు టీస్పూన్,
పసుపు - రెండు చిటికెలు,
చాట్ మసాలా - పావు టీస్పూన్,
గోధుమ పిండి - మూడు టేబుల్ స్పూన్‌లు,
నెయ్యి లేదా నూనె - రెండు టేబుల్‌స్పూన్‌లు (తెప్లా పైన పూసేందుకు)

తయారుచేసే పద్ధతి :

గోధుమపిండిలో సొరకాయ తురుము, ఉప్పు, పచ్చిమిర్చి తరుగు, కొత్తిమీర తురుము, కసూరిమెంతి, కారం, పసుపు, చాట్ మసాలా, నూనె వేసి ముద్దలా కలపాలి. సొరకాయలో నీళ్లు ఉంటాయి కాబట్టి పిండి కలిపేటప్పుడు ప్రత్యేకించి నీళ్లు పోయనక్కర్లేదు. ఒకవేళ పిండి మరీ జారుగా అయితే మరికొంచెం గోధుమపిండి కలపండి. మెత్తటి ముద్ద తయారుచేసుకున్న తరువాత దాన్నుంచి పది చిన్న చిన్న ఉండలు చేయాలి.
ఆ తరువాత రొట్టెల పెనాన్ని వేడి చేయాలి. అది వేడెక్కుతుండగానే గోధుమపిండిలో ఉండల్ని దొర్లించి రొట్టెల కర్రతో నాలుగైదు అంగుళాల వెడల్పులో గుండ్రంగా వత్తాలి. వీటిని వేడెక్కిన పెనం మీద వేసి ఎర్రటి మచ్చలు వచ్చే వరకు కాల్చాలి. ఆ తరువాత రెండో వైపు తిప్పి పైన నూనె పూసి చివర్లను గరిటెతో నొక్కుతూ కాల్చాలి. ఇలానే రెండో వైపు కూడా చేయాలి. రెడీ అయిన తెప్లాలను మీకు నచ్చిన కూర లేదా పచ్చడితో తినొచ్చు. ప్రయాణాల్లో వీటిని వేడివేడి టీతో కలిపి తిన్నా బాగుంటాయి.

మూలం : ఆంద్రజ్యోతి దినపత్రిక

సగ్గుబియ్యం దధ్యోదనం

6/11/2013

కావలసిన పదార్థాలు :
సగ్గుబియ్యం - రెండు కప్పులు
పెరుగు - మూడు కప్పులు
కరివేపాకు - రెండు రెబ్బలు
కొత్తిమీర తరుగు - కొద్దిగా
ఉప్పు - తగినంత
తాలింపు గింజలు - అన్ని కలిపి చెంచ
ఎండు మిర్చి - ఒకటి
వేయించిన పల్లీల పొడి - మూడు చెంచాలు
చక్కెర - రెండు చెంచాలు
మిరియాలు - అర చెంచ
నూనె - రెండు చెంచాలు

తయారుచేసే పద్ధతి :

ముందుగా పొయ్యి మీద బాణలి పెట్టి సగ్గు బియ్యాన్ని నూనె లేకుండానే ఎర్రగా వేయించుకొని వేడి చల్లారాక పెరుగులో కలపాలి.
ఇప్పుడు బాణలిలో నూనె వేడి చేసి తాలింపు గింజలూ, మిరియాలూ, ఎండు మిర్చిని వేయించాలి. ఆ తర్వాత కరివేపాకు కూడా వేయాలి. నిమిషమయ్యాక దింపేసి చల్లారనిచ్చి పెరుగులో వేయాలి. ఆ తర్వాత తగినంత ఉప్పుతో పాటు మిగిలిన పదార్థాలన్నీ ఒక్కొక్కటిగా వేస్తే సరిపోతుంది.

మూలం : ఈనాడు వసుంధర

మామిడి ఆవడ

6/11/2013

కావలసిన పదార్థాలు :
మినప్పప్పు - కప్పు
పెరుగు - రెండు కప్పులు
మామిడికాయ తురుము - కప్పు
పచ్చిమిర్చి - 4
అల్లం - చిన్న ముక్క
జీలకర్ర - టీస్పూన్
మిరియాలు - టీస్పూన్
కరివేపాకు - రెండు రెమ్మలు
క్యారెట్ తురుము - టేబుల్ స్పూన్
అల్లం పేస్ట్ - అర టీస్పూన్
ఉప్పు - తగినంత
నూనె - వేయించడానికి సరిపడా
తాలింపు గింజలు - టీస్పూన్
డ్రై ఫ్రూట్స్ - కొద్దిగా

తయారుచేసే పద్ధతి :

మినప్పప్పును సుమారు 4 గంటల సేపు నానబెట్టాలి.
మామిడి తురుములో సరిపడా ఉప్పు కలిపి, కొద్దిసేపు అలాగే ఉంచి, తరువాత మామిడి తురుములో ఉండే నీరంతా గట్టిగా పిండి తీసేయాలి.
పెరుగులో అల్లం పేస్ట్, పచ్చిమిర్చి ముక్కలు, కొత్తిమీర తరుగు, కరివేపాకు, క్యారెట్ తురుము, తగినంత ఉప్పు వేసి బాగా కలపాలి.
స్టవ్ మీద బాణలి ఉంచి అందులో రెండు చెంచాల నూనె పోసి కాగాక, తాలింపు గింజలను వేసి వేయించి, పెరుగులో కలపాలి.
నానబెట్టుకున్న మినప్పప్పును శుభ్రంగా కడిగి గ్రైండర్ లో వేసి గట్టిగా రుబ్బుకోవాలి.
మామిడి తురుము, సన్నగా తరిగిన అల్లం ముక్కలు, పచ్చిమిర్చి ముక్కలు, మిరియాలు, జీలకర్ర, ఉప్పు వేసి మరో మారు రుబ్బాలి.
బాణలిలో నూనె వేసి వేడి అయ్యాక రుబ్బి ఉంచుకున్న పిండిని గారెల్లాగా వేయాలి.
వేగిన గారెలను ఒక నిమిషం పాటు నీటిలో ఉంచి తీసి పెరుగులో వేయాలి. డ్రై ఫ్రూట్స్ తురుముతో గార్నిష్ చేసి సర్వ్ చేస్తే మామిడి ఆవడలు రుచిగా ఉంటాయి.

మూలం : సాక్షి దినపత్రిక

అటుకుల ఉప్మా

6/11/2013

కావలసిన పదార్థాలు :
అటుకులు - ఒక కప్పు
టమోటాలు - 50 గ్రా.
ఉల్లిపాయ - ఒకటి (పెద్దది)
ఎండుమిరపకాయలు - రెండు
అల్లం - చిన్న ముక్క
నూనె - 50 గ్రా.
ఆవాలు - అరటీస్పూన్
జీలకర్ర - అరటీస్పూన్
మినప్పప్పు - ఒక టీస్పూన్
కరివేపాకు - కొంచెం
ఉప్పు - తగినంత

తయారుచేసే పద్ధతి :

మొదట ఉల్లిపాయను, టొమాటను ముక్కలుగా తరిగి పెట్టుకోవాలి.
తర్వాత స్టవ్ మీద బాణలి పెట్టి నూనె పోసి కాగిన తర్వాత ఆవాలు, జీలకర్ర, మినప్పప్పు, కరివేపాకు,(ఇష్టమైతే వేరుసెనగ పల్లీలు కూడా వేసుకోవచ్చు) ఎండుమిరపకాయలు వేసి చిటపటలాడించుకోవాలి. అలాగే ఉల్లిపాయ ముక్కలు వేసి దోరగా వేయించుకోవాలి. అనంతరం అల్లం, టమాటో ముక్కలు వేసి మూడు నిముషాలు వేగనివ్వాలి. రెండు కప్పుల నీరు పోసి, తగినంత ఉప్పు చేర్చి మూతపెట్టి మరిగించుకోవాలి. బాగా తెర్లిన తర్వాత అందులో అటుకులు వేసుకోవాలి. చివరగా చిటికెడు పసుపు చేర్చి మూడు నిముషాలు ఉడికించాలి. అంతే రుచికరమైన అటుకుల ఉప్మా రెడీ.

మూలం : సాక్షి దినపత్రిక

ఎగ్ బోండాలు

6/10/2013

కావలసిన పదార్థాలు :
సెనగ పిండి - అరకిలో
గుడ్లు - 10
వేరుసెనగ పప్పు - 250 గ్రా.
ఎండు కొబ్బరి - సగం చిప్ప
ఎండు మిరపకాయలు - 4
నూనె - వేయించడానికి సరిపడా
ఉప్పు - తగినంత

తయారుచేసే పద్ధతి :

మొదట కోడిగుడ్లను ఉడకబెట్టి, పొక్కులు తీసి పెట్టుకోవాలి. ఎండు కొబ్బరిని తురుమి పెట్టుకోవాలి. వేరుసెనగ పప్పును బాణలిలో వేసి (నూనె లేకుండా) వేయించాలి. తర్వాత పొట్టు తీసి ఎండు మిరపకాయలతో కలిపి రుబ్బుకోవాలి. ఎండు కొబ్బరి తురుమును, మూడు చిటికెల ఉప్పును వేసి మరో సారి రుబ్బుకోవాలి.
ఆ తర్వాత ఉడికించిన గుడ్డును మధ్య భాగంలో కత్తితో కోసి, అందులో వేరుసెనగపప్పు, ఎండుకొబ్బరి మిశ్రమాన్ని పెట్టాలి.
ఒక పాత్రలో సెనగపిండి, తగినంత ఉప్పు, ఒక టీస్పూన్ కారం పొడి కలిపి, కావలసినన్ని నీళ్ళు పోసి కాస్త గట్టిగా కలుపుకోవాలి.
స్టవ్ పై బాణలి పెట్టి, అందులో డీప్ ఫ్రైకి సరిపడా నూనె వేయాలి. నూనె బాగా కాగిన తర్వాత వేరుసెనగపప్పు, ఎండు కొబ్బరి మిశ్రమం పెట్టిన గుడ్లను సెనగపిండిలో ముంచి తీసి కాగుతున్న నూనెలో వేసి వేయించాలి. అంతే నోరూరించే ఎగ్ బోండాలు రెడీ.

మూలం : సాక్షి దినపత్రిక

వెజ్ వడలు

6/10/2013

కావలసిన పదార్థాలు :
మినప్పప్పు - 300 గ్రా.
బియ్యం - 2 టేబుల్ స్పూన్లు
క్యారెట్ - 100 గ్రా.
బీన్స్ - 100 గ్రా.
పచ్చి బఠానీ - 100 గ్రా.
ఉల్లిపాయలు - 5 (పెద్దవి)
పచ్చిమిరపకాయలు - 3
డాల్డా - 1 స్పూన్
అల్లం - చిన్న ముక్క
కొత్తిమీర - కొంచెం
కరివేపాకు - కొంచెం
నూనె - వేయించడానికి సరిపడా
ఉప్పు - తగినంత

తయారుచేసే పద్ధతి :

ముందుగా మినప్పప్పులో బియ్యం కలుపుకొని ఒక గంట సేపు నానబెట్టాలి. మరోవైపు క్యారెట్, బీన్స్ ను చిన్న చిన్న ముక్కలుగా తరిగి పెట్టుకోవాలి. తర్వాత నానబెట్టిన మినప్పప్పును గ్రైండర్ లో వేసి రెండు నిముషాలు రుబ్బాలి. తర్వాత పచ్చిమిరపకాయలను, అల్లం ముక్క, కొత్తిమీర, కరివేపాకు, తగినంత ఉప్పు వేసి వడలకు కలిపే పిండిలా కలుపుకోవాలి. రుబ్బిన పిండిని ఒక పాత్రలోకి తీసుకొని అందులో తరిగి పెట్టుకున్న క్యారెట్, బీన్స్ ముక్కలను, పచ్చి బఠానీలను, డాల్డాను వేసి బాగా కలపాలి.
అనంతరం స్టవ్ మీద బాణలి పెట్టి నూనె వేయాలి.
నూనె బాగా కాగిన తర్వాత కూరగాయలు చేర్చిన మినప్పప్పు పిండిని వడలాగా తట్టి కాగుతున్న నూనెలో వేసి బాగా వేయించాలి. ఇంకేముంది నోరూరించే వెజ్ వడలు రెడీ. వీటిని పచ్చి కొబ్బరి చట్నీతో గాని, ఎండు మిరపకాయ చట్నీతో గాని తినవచ్చు.

మూలం : సాక్షి దినపత్రిక

రాగి వడలు

6/7/2013

కావలసిన పదార్థాలు :
రాగి పిండి - అరకిలో
సెనగపప్పు - 100 గ్రా.
జీలకర్ర - 25 గ్రా.
పచ్చిమిరపకాయలు - 30 గ్రా.
ఉల్లిపాయలు - 200 గ్రా.
వంట సోడా - అరటీస్పూన్
కరివేపాకు - కొంచెం
ఉప్పు - తగినంత
నూనె - వేయించడానికి సరిపడా

తయారుచేసే పద్ధతి :

మొదట ఉల్లిపాయలు, పచ్చిమిరపకాయలను సన్నగా తరిగి పెట్టుకోవాలి. తర్వాత ఒక వెడల్పాటి పాత్రలోకి రాగి పిండి తీసుకోవాలి.
అందులో తరిగి పెట్టుకున్న పచ్చిమిరపకాయ, ఉల్లిపాయ ముక్కలు, సెనగపప్పు, జీలకర్ర, వంట సోడా, కరివేపాకు, (కావాలనుకుంటే కొంచెం మునుగాకు కూడా వేసుకోవచ్చు) తగినంత ఉప్పు, నీళ్ళు పోసి చపాతీ పిండిలా చేసుకోవాలి. స్టవ్ మీద బాణలి పెట్టి డీప్ ఫ్రై కి సరిపడ నూనె పోసుకొని, అది బాగా కాగాక రాగి పిండి మిశ్రమాన్ని వడలా చేతితో కావలసిన ఆకారంలో తట్టి నూనెలో వేసి డీప్ ఫ్రై చేసుకోవాలి. అంతే నోరూరించే రాగి వడలు రెడీ. ఇవి రుచిగా ఉండడమే కాక ఆరోగ్యానికి చాలా మంచిది.

మూలం : సాక్షి దినపత్రిక

ఓట్స్ సగ్గుబియ్యం వడలు

6/7/2013

కావలసిన పదార్థాలు :
ఓట్స్ - 100 గ్రా.
సగ్గుబియ్యం - 150 గ్రా.
బంగాళదుంప - ఒకటి
బియ్యప్పిండి - 50 గ్రా.
ఉల్లిపాయ - ఒకటి
అల్లం - చిన్న ముక్క
పచ్చిమిర్చి - మూడు
మజ్జిగ - తగినంత
ఉప్పు - తగినంత
నూనె - వేయించడానికి సరిపడా

తయారుచేసే పద్ధతి :

ఉల్లిపాయ, అల్లం, పచ్చిమిర్చిని సన్నగా తరగాలి.
బంగాళదుంపను ఉడికించి పొట్టు తీసి మెత్తగా చిదమాలి.
సగ్గుబియ్యం, ఓట్స్ ను మజ్జిగలో గంట సేపు నాననివ్వాలి. ఇప్పుడు సగ్గుబియ్యం, ఓట్స్ మిశ్రమంలో చిదిమిన బంగాళదుంప, ఉల్లిపాయ ముక్కలు, అల్లం, పచ్చిమిర్చి ముక్కలు, బియ్యప్పిండి, ఉప్పు వేసి కలపాలి. బాణలిలో నూనె వేసి కాగాక ఈ మిశ్రమాన్ని చిన్న చిన్న వడల్లా వేసి ఎర్రగా వేయించి తీయాలి.

మూలం : సాక్షి దినపత్రిక