Blog Archives - telugutaruni.weebly.com

కార్న్ టిక్కి

5/30/2013

కావలసిన పదార్థాలు :
స్వీట్ కార్న్ గింజలు - కప్పు
బంగాళాదుంపలు - 2(మీడియం సైజ్)
పచ్చిమిర్చి - 2
అల్లం తురుము - అరటీస్పూన్
వెల్లుల్లి రెబ్బలు - 5
నూనె - వేయించడానికి సరిపడా
గరం మసాలా - అరటీస్పూన్
నిమ్మరసం - 2 టీస్పూన్లు
కొత్తిమీర తురుము - అరకప్పు
ఉప్పు - రుచికి సరిపడా

తయారుచేసే పద్ధతి :

ముప్పావు కప్పు మొక్కజొన్న గింజల్ని ఉడికించి కచ్చాపచ్చాగా రుబ్బాలి.
తరువాత అందులో మెత్తగా దంచిన వెల్లుల్లి, సన్నగా తరిగిన పచ్చిమిర్చి వేసి ముద్దలా చేయాలి.
బంగాళాదుంపలు ఉడికించి పొట్టు తీసి మెత్తగా మెదపాలి. తరువాత అందులో బ్రెడ్ పొడి, మొక్కజొన్న ముద్ద, మిగిలిన పావు కప్పు మొక్కజొన్న గింజలు, కొత్తిమీర తురుము, గరం మసాలా, నిమ్మరసం, ఉప్పు వేసి బాగా కలపాలి.
మిశ్రమాన్ని చిన్న చిన్న ముద్దలుగా చేసుకొని ఒక్కో ముద్దన అరచేతుల్లోనే గుండ్రని బిళ్ళల్లా వత్తి పెనం మీద నూనె వేస్తూ రెండు వైపులా కాల్చి తీయాలి.

మూలం : ఈనాడు ఆదివారం పుస్తకం

లెహ్ సుని టిక్కి

5/30/2013

కావలసిన పదార్థాలు :
పన్నీర్ తురుము - పావుకప్పు
బంగాళాదుంపలు - 6(మీడియం సైజ్)
కారం - అరటేబుల్ స్పూన్
ఉల్లిపాయ - ఒకటి
వెల్లుల్లి రెబ్బలు - 6
నూనె - వేయించడానికి సరిపడా
జీడిపప్పు - 8
కొత్తిమీర తురుము - అరకప్పు
ఉప్పు - రుచికి సరిపడా

తయారుచేసే పద్ధతి :

బంగాళాదుంపలు ఉడికించి పొట్టు తీసి మెత్తగా మెదపాలి. తరువాత అందులో ఉప్పు వేసి కలిపి చిన్న చిన్న ఉండల్లా చేయాలి.
ఉల్లిపాయనీ, వెల్లుల్లినీ సన్నగా తరగాలి. జీడిపప్పుని మెత్తగా దంచాలి. తరువాత వీటిలోనే తరిగిన ఉల్లి, వెల్లుల్లి, కొత్తిమీర వేసి కలపాలి. ఈ మిశ్రమాన్ని కొద్ది కొద్దిగా తీసుకొని బంగాళదుంప ముద్ద మధ్యలో పెట్టి గుండ్రని బిళ్ళల్లా వత్తి కాగిన నూనెలో వేయించి తీయాలి.

మూలం : ఈనాడు ఆదివారం పుస్తకం

సేమ్యా టిక్కి

5/30/2013

కావలసిన పదార్థాలు :
సేమ్యా - అరకప్పు
బంగాళాదుంపలు - 2
బఠానీలు - పావు కప్పు
ఉల్లిపాయ - ఒకటి
పచ్చిమిర్చి - 3
నూనె - వేయించడానికి సరిపడా
అల్లం - చిన్న ముక్క
కొత్తిమీర తురుము - అరకప్పు
మైదా పిండి - అరకప్పు
బ్రెడ్ పొడి - కప్పు
ఉప్పు - రుచికి సరిపడా

తయారుచేసే పద్ధతి :

బఠానీలు నానబెట్టి ఉంచాలి.
ముందుగా సేమ్యా ఉడికించి నీళ్ళు వంపేసి పక్కన ఉంచాలి.
బంగాళదుంప, క్యారెట్ చెక్కు తీసి సన్నగా తరగాలి. ఉల్లిపాయలు, అల్లం, పచ్చిమిర్చి కూడా సన్నగా తరగాలి.
బాణలిలో కొద్దిగా నూనె వేసి కాగాక ఉల్లిపాయ, అల్లం, పచ్చిమిర్చి, కొత్తిమీర తురుము వేసి వేయించాలి. తరువాత కూరగాయ ముక్కలు, నానబెట్టిన బఠానీలు వేసి మూతపెట్టి కాసేపు ఉడికించుకోవాలి. తరువాత ఉడికించి ఉంచిన సేమ్యా, ఉప్పు వేసి బాగా కలిపి ఐదు నిమషాలు వేయించాలి. ఈ మిశ్రమం చల్లారాక చిన్న బిళ్ళల్లా చేయాలి.
మైదా పిండిలో కొద్దిగా నీళ్ళు పోసి జారుగా కలుపుకోవాలి. ఇప్పుడు సేమ్యా మిశ్రమం బిళ్ళల్ని ఈ పిండిలో ముంచి బ్రెడ్ పొడిలో దొర్లించి నూనెలో వేయించి తీయాలి.

మూలం : ఈనాడు ఆదివారం పుస్తకం

అటుకుల టిక్కి

5/30/2013

కావలసిన పదార్థాలు :
అటుకులు - 2 కప్పులు
బంగాళాదుంపలు - 3
మొక్కజొన్న పిండి - కప్పు
చిల్లీ సాస్ - 2 టీస్పూన్లు
టొమాటో సాస్ - 2 టీస్పూన్లు
నూనె - వేయించడానికి సరిపడా
అల్లం వెల్లుల్లి - టీస్పూన్
కొత్తిమీర తురుము - అరకప్పు
ఉప్పు - రుచికి సరిపడా

తయారుచేసే పద్ధతి :

బంగాళాదుంపలు ఉడికించి పొట్టు తీసి మెదపాలి.
అందులో మొక్కజొన్న పిండి, అల్లం వెల్లుల్లి, కొత్తిమీర తురుము, చిల్లీ సాస్, టొమాటో సాస్, ఉప్పు, అటుకులు కలపాలి.
మిశ్రమాన్ని చిన్న చిన్న ముద్దలుగా చేసి అరచేతిలోనే గుండ్రని పట్టీల్లా వత్తి కాగిన నూనెలో వేయించి తీయాలి.

మూలం : ఈనాడు ఆదివారం పుస్తకం

హరియాలి టిక్కి

5/30/2013

కావలసిన పదార్థాలు :
బంగాళాదుంపలు - 4
పచ్చిమిర్చి తురుము - టేబుల్ స్పూన్
పాలకూర - 4 కట్టలు (చిన్నవి)
చాట్ మసాలా - టీస్పూన్
నూనె - వేయించడానికి సరిపడా
అల్లం తురుము - టీస్పూన్
కొత్తిమీర తురుము - 2 టేబుల్ స్పూన్లు
కార్న్ ఫ్లోర్ - 2 టేబుల్ స్పూన్లు
ఉప్పు - రుచికి సరిపడా
పచ్చి బఠానీలు - ముప్పావు కప్పు

తయారుచేసే పద్ధతి :

బంగాళాదుంపలు ఉడికించి పొట్టు తీసి మెదపాలి.
బఠానీలు కూడా ఉడికించి మెదపాలి. పాలకూరని ఉప్పు వేసి వేడి నీళ్ళలో వేసి తీసి సన్నగా తరగాలి.
ఉడికించిన బంగాళాదుంపలు,బఠానీలు, పాలకూరను అన్ని బాగా కలపాలి.అందులోనే అల్లం తురుము, కొత్తిమీర తురుము, ఉప్పు , పచ్చిమిర్చి తురుము చాట్ మసాలా వేసి కలపాలి. అందులోనే కార్న్ ఫ్లోర్ కూడా వేసి కలపాలి.
మిశ్రమాన్ని చిన్న చిన్న ముద్దలుగా చేసి అరచేతిలోనే గుండ్రని పట్టీల్లా వత్తి కాగిన నూనెలో వేయించి తీయాలి.

మూలం : ఈనాడు ఆదివారం పుస్తకం

పన్నీర్ సిగార్స్

5/28/2013

కావలసిన పదార్థాలు :
మైదా పిండి - పావుకిలో
స్టఫింగ్ కోసం:
పన్నీర్ తురుము - ముప్పావు కప్పు
ఉల్లికాడల తురుము - పావు కప్పు
చిల్లీగార్లిక్ సాస్ - టేబుల్ స్పూన్
చీజ్ - పావుకప్పు
నూనె - 2 టీస్పూన్లు
ఉప్పు - సరిపడా

తయారుచేసే పద్ధతి :

మైదాలో తగినన్ని నీళ్ళు, ఉప్పు వేసి పూరీ పిండిలా కలుపుకొని పది పురీల్లాగా చేసుకోవాలి.
మరో టేబుల్ స్పూన్ మైదా పిండిలో టేబుల్ స్పూన్ నీళ్ళు కలిపి పేస్ట్ లా చేసి పక్కన పెట్టుకోవాలి.
పాన్ లో నూనె వేసి ఉల్లికాడల తురుము వేసి వేయించాలి. తరువాత స్టఫింగ్ కోసం తీసుకున్న పదార్థాలన్నీ వేసి కలపాలి. రెండు నిముషాలు ఉడికిన తర్వాత పది భాగాలుగా చేయాలి.
ఒక్కో పూరీలో ఒక్కో భాగంగా చేసిన స్టఫ్ పెట్టి ఒకవైపు నుంచి చాపలా చుట్టుకొని రావాలి. తరువాత రెండు చివరలా అంచుల్ని మూసేసి ఊడిపోకుండా మైదా పేస్ట్ తో అతికించాలి. ఇలాగే అన్ని పూరీలను సిగార్స్ లా చుట్టి రెండు వైపులా అంచులు మూసేసి నూనెలో వేయించి తీయాలి. ఎక్కువగా ఉన్న నూనెను బ్లాటింగ్ పేపర్ తో అద్దాలి.

మూలం : ఈనాడు ఆదివారం పుస్తకం

చిల్లీ పన్నీర్

5/28/2013

కావలసిన పదార్థాలు :
పన్నీర్ - 400 గ్రా.
నూనె - వేయించడానికి సరిపడా
కొత్తిమీర తురుము - టేబుల్ స్పూన్
కోడిగుడ్లు - ఒకటి
కార్న్ ఫ్లోర్ - అరకప్పు
ఉల్లి తురుము - 2 కప్పులు
సోయాసాస్ - టేబుల్ స్పూన్
వెనిగర్ - 2 టేబుల్ స్పూన్లు
అజినమెటో - పావుటీస్పూన్
నీళ్ళు - కొద్దిగా
ఉల్లికాడల తురుము - టేబుల్ స్పూన్
అల్లం, వెల్లుల్లి - టీస్పూన్
పచ్చిమిర్చి తురుము - 2 టేబుల్ స్పూన్లు
ఉప్పు - 2 టీస్పూన్లు

తయారుచేసే పద్ధతి :

పన్నీర్ ను చదరపు ముక్కల్లా కోయాలి. ఓ గిన్నెలో పన్నీర్ ముక్కలు, టీస్పూన్ ఉప్పు, కోడిగుడ్డు, కార్న్ ఫ్లోర్, అల్లం వెల్లుల్లి, నీళ్ళు వేసి కలపాలి.
బాణలిలో నూనె వేడి అయ్యాక పన్నీర్ ముక్కల్ని వేసి బంగారు వర్ణంలోకి వచ్చే వరకు వేయించి పక్కన పెట్టుకోవాలి.
మరో బాణలిలో రెండు టేబుల్ స్పూన్ల నూనె వేసి వేడి అయ్యాక ఉల్లి తురుము వేసి వేగాక పచ్చిమిర్చి తురుము, సోయాసాస్, ఉప్పు, వెనిగర్, అజినమెటో వేసి కలపాలి.
తరువాత వేయించి తీసిన పన్నీర్ ముక్కలు వేసి కలిపి దించాలి. చివరగా వీటి మీద ఉల్లికాడల తురుము, కొత్తిమీర తురుము చల్లి అందించాలి.

మూలం : ఈనాడు ఆదివారం పుస్తకం

ఆలూ పన్నీర్ చాట్

5/28/2013

కావలసిన పదార్థాలు :
పన్నీర్ ముక్కలు - 2 కప్పులు
నూనె - టేబుల్ స్పూన్
కొత్తిమీర తురుము - టేబుల్ స్పూన్
నిమ్మరసం - టీస్పూన్
బేబీ పొటాటోలు - పది (ఉడికించి పొట్టు తీయాలి)
ఉడికించిన బఠానీలు - కప్పు
అల్లం తురుము - టీస్పూన్
పచ్చిమిర్చి తురుము - టీస్పూన్
మిరియాల పొడి - అరటీస్పూన్
ఉప్పు - రుచికి తగినంత
కారప్పూస - సరిపడా
ఆమ్ చూర్ - 2 టీస్పూన్లు

తయారుచేసే పద్ధతి :

బాణలిలో నూనె వేసి కాగాక పచ్చిమిర్చి తురుము, అల్లం తురుము వేసి ఓ నిమిషం వేయించాలి. తరువాత పన్నీర్ ముక్కలు, ఉడికించిన బంగాళదుంప ముక్కలు, బటానీలు వేసి మరో నిమిషం వేయించాలి. ఇప్పుడు ఆమ్ చూర్, మిరియాల పొడి, నిమ్మరసం, ఉప్పు వేసి బాగా కలపాలి. చివరగా కొత్తిమీర, కాస్త కారప్పూస చల్లి అందిస్తే సరి.

మూలం : ఈనాడు ఆదివారం పుస్తకం

తందూరీ టిక్కా

5/28/2013

కావలసిన పదార్థాలు :

పన్నీర్ ముక్కలు - 12
నూనె - టేబుల్ స్పూన్
చాట్ మసాలా - టీస్పూన్
కొత్తిమీర తురుము - టేబుల్ స్పూన్

పన్నీర్ కు పట్టించేందుకు
నిమ్మరసం - అరటీస్పూన్
కారం - అరటీస్పూన్
జీలకర్ర పొడి - అరటీస్పూన్
పెరుగు - ముప్పావు కప్పు
అల్లం ముద్ద - అరటీస్పూన్
పచ్చిమిర్చి ముద్ద - అరటీస్పూన్
మిరియాల పొడి - టీస్పూన్
వాము - అరటీస్పూన్
సోంపు - టీస్పూన్
పసుపు - పావు టీస్పూన్
సెనగపిండి - ముప్పావు కప్పు
నూనె - టీస్పూన్
ఉప్పు - రుచికి తగినంత
కుంకుమ పువ్వు - కొద్దిగా (టేబుల్ స్పూన్ పాలల్లో నానబెట్టాలి)

తయారుచేసే పద్ధతి :

పన్నీర్ కి పట్టించే పదార్థాలన్నింటిని ఓ గిన్నెలో వేసి కలపాలి. తరువాత ఈ మిశ్రమాన్ని ముక్కలకు పట్టించి అరగంట సేపు పక్కన ఉంచాలి.
నాన్ స్టిక్ పాన్ తీసుకొని మూడు లేక నాలుగు పన్నీర్ ముక్కలు చొప్పున వేసి నూనె వేస్తూ రెండు వైపులా కాల్చి తీయాలి. ఇలాగే అన్ని కాల్చాలి. వీటి మీద చాట్ మసాలా, కొత్తిమీర తురుము చల్లి అందించాలి.

మూలం : ఈనాడు ఆదివారం పుస్తకం

పన్నీర్ టిక్కి

5/28/2013

కావలసిన పదార్థాలు :
సెనగ పప్పు - అరకప్పు (రెండు గంటలు నానబెట్టి రుబ్బాలి)
పన్నీర్ - అరకిలో
ఎండుమిర్చి - 5
చాట్ మసాలా - 2 టీస్పూన్లు
అల్లం - చిన్న ముక్క
పచ్చిమిర్చి - 6

టిక్కి కోసం :
బంగాళాదుంపలు - 4
కార్న్ ఫ్లోర్ - టీస్పూన్
నూనె - సరిపడా

తయారుచేసే పద్ధతి :

బాణలిలో నూనె పోసి అల్లం తురుము, పచ్చిమిర్చి తురుము వేసి ఓ నిమిషం వేయించాలి. తరువాత కచ్చాపచ్చాగా రుబ్బిన సెనగపప్పు, ఉప్పు, ఎండు మిర్చి ముక్కలు, చాట్ మసాలా వేసి వేయించాలి. పప్పు బాగా వేగిన తర్వాత పన్నీర్ తురుము వేసి బాగా కలపాలి.
ఒక గిన్నెలో బంగాళాదుంపలు ఉడికించి కాస్త ఉప్పు వేసి మెత్తగా మెదపాలి. అవసరమైతే కొద్దిగా నీళ్ళు చిలకరించాలి. ఇప్పుడు బంగాళాదుంపల మిశ్రమాన్ని కొద్దిగా తీసుకొని అరచేతిలోనే చిన్న సైజ్ టిక్కిలా చేసుకొని మద్యలో పన్నీర్ మిశ్రమాన్ని పెట్టి మళ్లీ మూసేసి టిక్కిలా చేసి కార్న్ ఫ్లోర్ లో దొర్లించి నూనెలో వేయించి తీయాలి.

మూలం : ఈనాడు ఆదివారం పుస్తకం