Blog Archives - telugutaruni.weebly.com

ఆవిల్‌ ఖీర్‌

6/28/2013

కావలసిన వస్తువులు:
ఓట్స్‌ - 250గ్రాములు,
చక్కెర -2 టేబుల్‌స్పూన్స్‌
ఆవిల్‌ -1
తేనె 50గ్రాములు
కాజు-బాదంపలుకులు 25 గ్రాములు,
పాలు - 1/2 లీటరు
నెయ్యి 1టేబుల్‌ స్పూన్‌
ఇలాయిచి పొడి - చిటికెడు
తయారు చేసే విధానం:

ముందుగా ఓట్స్‌ నెయ్యివేసి వేయించి ఫ్రై చేసి, మిక్సిలో వేసి పొడిచేసుకోవాలి.
స్టవ్‌ మీద పాత్ర పెట్టి పాలు బాగా మరగ నివ్వాలి. అందులో ఈ ఓట్స్‌ మిశ్రమం వేసి తిప్పుతూ ఆవిల్‌ కడిగి ముక్కలు చేసుకుని అందులో కలపాలి. ఇవి కూడ బాగ కలియ తిప్పుతూ చక్కెర, తేనే వేసి చివర్న బాదామ్‌ - జీడి పలుకులు వేసి దించాలి.ఇలాయిచిపొడి వేసి కలియ తివ్పి కొద్దిగా చల్లారాక సర్వ్‌ చేసుకోవాలి. వెరైటీగా రుచిగా ఉంటుందీ ఖీర్‌. ఒకసారి తింటే మళ్ళీ మళ్ళీ చేసుకోవాలనిపిస్తుందంటే అతిశయోక్తి కాదు.

మూలం : సూర్య దినపత్రిక

ఓట్స్‌- కొబ్బరి హల్వా

6/27/2013

కావలసిన పదార్థాలు :
ఓట్స్‌ - 250 గ్రాములు,
పచ్చికొబ్బరి కోరు - 100 గ్రాములు,
చక్కెర - 1 పెద్దకవ్పు,
నెయ్యి -50గ్రాములు,
జీడిపప్పు,ద్రాక్ష - 25గ్రాములు,
సాఫ్రాన్‌ కలర్‌ - చిటికడు,
పాలు - 1 చెంచా.

తయారు చేసే విధానం:

ఓట్స్‌ కొద్దిగా నెయ్యి వేసి వేయించి పొడి చేసుకోవాలి, పచ్చికొబ్బరి కోరు రెడీగా పెట్టుకొని స్టవ్‌ వెలిగించి కడాయిలో కొద్దిగా నెయ్యి వేసి జీడి పప్పు - ద్రాక్ష వేయించి పక్కన పెట్టుకోవాలి.
ఒక గిన్నెలో చక్కెర వేసి కొద్దిగా నీరు వేసి పాకం లేతగా రాగానే కొబ్బరి కోరు, ఓట్స్‌ పొడి వేసి కలపాలి. పాలల్లో కలిసిన సాఫ్రాన్‌ వేసి కలిపి, నెయ్యి వేయాలి. ఒక్క ఐదునిమిషాల తర్వాత నెయ్యి తేలుతుంది. వేయించిన జీడిపప్పు - ద్రాక్ష వేసి దించుకుంటే ఓట్స్‌- కొబ్బరి హల్వా రెడీ.

మూలం : సూర్య దినపత్రిక

డబుల్ కా మీఠా

6/27/2013

కావలసిన పదార్థాలు :
బ్రెడ్ స్లైసులు - 6;
పాలు - ఒకటిన్నర కప్పులు;
పంచదార - ఒక కప్పు;
కిస్‌మిస్ - పావు కప్పు
నెయ్యి - రెండు కప్పులు;
కుంకుమపువ్వు - కొద్దిగా
బాదంపప్పులు - 10;
ఏలకులపొడి - అర టీ స్పూను
వేయించిన జీడిపప్పు - అర కప్పు;
పచ్చికోవా - కప్పు

తయారుచేసే పద్ధతి:

ఒక పాత్రను స్టౌ మీద ఉంచి, పాలు, ఏలకుల పొడి (సగం), కుంకుమపువ్వు వేసి 20 నిముషాలు ఉడికించాలి.
స్టౌ మీద పాన్ ఉంచి అందులో కొద్దిగా నెయ్యి వేసి కరిగాక బ్రెడ్‌ముక్కలను గోధుమరంగు వచ్చేవరకు వేయించాలి.
మరొక పాత్రలో పంచదార, నీరు, రెండు ఏలకులు దంచిన పొడి వేసి తీగ పాకం వచ్చాక అందులో పాల మిశ్రమం, బ్రెడ్ ముక్కలు వేసి దగ్గర పడేవరకు ఉడికించాలి.
పచ్చికోవా, నెయ్యి వేసి రెండు నిముషాలు ఉడికించి దించేయాలి.
జీడిపప్పు, బాదంపప్పు, కిస్‌మిస్‌లతో గార్నిష్ చేయాలి.

మూలం : సాక్షి దినపత్రిక

సొరకాయ హల్వా

6/26/2013

కావలసిన పదార్థాలు :
సొరకాయ తురుము - 500 గ్రాములు,
నెయ్యి - మూడు టేబుల్ స్పూన్లు,
యాలకులు - నాలుగు,
పంచదార - రుచికి సరిపడా,
పాలు - సరిపడా,
జీడిపప్పు, కిస్‌మిస్, బాదం పప్పులు - అలంకరణ కోసం.

తయారుచేసే పద్ధతి :

నాన్‌స్టిక్ పాన్‌లో నెయ్యి వేడిచేసి అందులో నట్స్, కిస్‌మిస్ వేసి బంగారు రంగు వచ్చే వరకు వేగించాలి. ఒకవేళ వీటిని వేగించడం ఇష్టంలేకపోతే అలానే వాడొచ్చు.
అదే పాన్‌లో సొరకాయ తురుము వేసి ఏడు నిమిషాల పాటు సన్నటి మంటపై వేగించాలి. ఇందులో పాలు, యాలకులు వేసి మరో పదినిమిషాల పాటు ఉడికించాలి. తరువాత పంచదార వేసి ఒక నిమిషం పాటు సన్నటి మంట మీద ఉంచాలి. హల్వా పాలను బాగా పీల్చుకుందో లేదో గమనించి స్టవ్ మీద నుంచి దింపేయాలి. పైన నట్స్‌తో అలంకరిస్తే చూస్తుంటేనే తినేయాలనిపిస్తుంది.

మూలం : ఆంద్రజ్యోతి దినపత్రిక

సొరకాయ బర్ఫీ

6/21/2013

కావలసిన పదార్థాలు :

సొరకాయ ముక్కలు - నాలుగు కప్పులు
నెయ్యి - నాలుగు చెంచాలు
చక్కెర - రెండు కప్పులు
కోవా - పావుకేజీ
జీడిపప్పు పలుకులు - కొన్ని
యాలకుల పొడి - చెంచా

తయారుచేసే పద్ధతి :

సన్నటి మంట మీద బాణలి పెట్టి రెండు చెంచాల నెయ్యి వేడి చేసి సొరకాయ తురుమును వేయించాలి. దాని పచ్చి వాసన పోయి మెత్తగా అయ్యాక చక్కెర వేసేయాలి. అది కరిగి దగ్గర పడే వరకు మధ్య మధ్య కలుపుతూ ఉండాలి. మిశ్రమం దగ్గరగా అయ్యాక మిగిలిన నెయ్యి, కోవా, యాలకుల పొడి, జీడిపప్పు పలుకులు వేసి మరోసారి కలిపి దించాలి. దీన్ని నెయ్యి రాసిన పళ్ళెంలోకి తీసుకోవాలి. అరగంట దాటాక ఇది గట్టిపడుతుంది. ఆ తర్వాత ముక్కల్లా కోసుకొని వేరుచేస్తే సరిపోతుంది. నోరూరించే సొరకాయ బర్ఫీ రెడీ.

మూలం : ఈనాడు వసుంధర

క్యారెట్ బర్ఫీ

6/17/2013

కావలసిన పదార్థాలు :
క్యారెట్ తురుము - కప్పు
చక్కెర - కప్పు
పాలు - అర లీటర్
నెయ్యి - రెండు టేబుల్ స్పూన్లు
కొబ్బరి తురుము - కప్పు
జీడిపప్పు పలుకులు - పావుకప్పు

తయారుచేసే పద్ధతి :

ముందుగా బాణలిలో చెంచ నెయ్యి వేసి, కాగాక క్యారెట్ తురుమును దోరగా వేయించాలి. అలాగే మరో చెంచ నెయ్యి కరిగించి కొబ్బరి తురుమును కూడా వేయించి పక్కన పెట్టుకోవాలి.
ఇప్పుడు అడుగు మందంగా ఉన్న గిన్నె తీసుకొని పాలు మరిగించాలి. అవి పొంగాక చక్కెర వేసి కరిగేదాకా కలిపి తర్వాత క్యారెట్ తురుము, కొబ్బరి తురుమును వేయాలి. మంట తగ్గించి, మధ్యమధ్యలో కలుపుతూ కొద్దిగా నెయ్యి వేస్తూ ఉంటే కాసేపటికి పాలు దగ్గరికి అవుతాయి. అప్పుడు సన్నగా చేసిన జీడిపప్పు పలుకులు కూడా వేసి కలిపి నెయ్యి రాసిన పళ్ళెంలోకి తీసుకోవాలి. వేడి చల్లారాక ముక్కల్లా కోసుకుంటే క్యారెట్ బర్ఫీ రెడీ.

మూలం : ఈనాడు వసుంధర

క్యారెట్ మురబ్బా

6/17/2013

కావలసిన పదార్థాలు :
క్యారెట్ - అరకేజీ
చక్కెర - పావుకేజీ
నిమ్మరసం - పావు కప్పు

తయారుచేసే పద్ధతి :

క్యారెట్లను కడిగి చక్రాల్లా తరిగి ఫోర్క్ తో మధ్యలో రంద్రం చేయాలి. ఈ ముక్కల్ని ఐదు నిముషాలు ఉడికించుకొని నీళ్ళు వంపేసి గిన్నెలోకి తీసుకోవాలి.
ఓ గిన్నెలో చక్కెర తీసుకొని పావు గ్లాసు నీళ్ళు పోసి తీగ పాకం రానివ్వాలి. అందులో క్యారెట్ ముక్కలు కూడా వేసి మంట తగ్గించాలి. ముదురు పాకం వచ్చి, ఆ తీపి క్యారెట్ ముక్కలకి పట్టిందని నిర్ధారించుకున్నాక దింపేయాలి. నిమ్మరసం కూడా కలిపి, చల్లారనిచ్చి గాలి తగలని, తడి లేని డబ్బాలోకి తీసుకుంటే సరిపోతుంది. తియ్యగా, పుల్లగా క్యారెట్ మురబ్బా అప్పుడప్పుడు చప్పరించేందుకు సిద్దం.

మూలం : ఈనాడు వసుంధర

ఆరెంజ్ బాల్స్

6/13/2013

కావలసిన పదార్థాలు :
పన్నీర్ తురుము - పెద్ద కప్పు
పాల పొడి - అరకప్పు
చక్కెర పొడి - రెండు టేబుల్ స్పూన్లు
యాలకుల పొడి - చెంచ
ఆరెంజ్ పొడి - అరకప్పు

తయారుచేసే పద్ధతి :

నాన్ స్టిక్ పాన్ ని సన్నని మంటపై వేడిచేసి పన్నీర్ తురుము, చక్కెర పొడి వేసి వేయించాలి. రెండు లేక మూడు నిమిషాలయ్యాక పాలపొడి కలపాలి. అది కూడా కొద్దిగా వేగాక యాలకుల పొడి వేసి దించేయాలి. ఈ క్రమంలో మరీ వేగి రంగు మారకుండా చూసుకోవాలి.
వేడి కొద్దిగా తగ్గాక ఉండల్లా చేసుకొని ఆరెంజ్ పౌడర్ లో ముంచి తీయాలి. వీటిని పది లేక పదిహేను నిముషాలు ఫ్రిజ్ లో ఉంచితే పొడి పన్నీర్ ఉండలకు పడుతుంది.

మూలం : ఈనాడు వసుంధర

పన్నీర్ పాయసం

6/13/2013

కావలసిన పదార్థాలు :
పాలు - రెండు కప్పులు
పన్నీర్ తురుము - అర కప్పు
జీడిపప్పు - అరకప్పు
చక్కెర - అరకప్పు
యాలకుల పొడి - చెంచ
నెయ్యి - చెంచ
అలంకరణకు జీడిపప్పు, బాదం పలుకులు - పావుకప్పు

తయారుచేసే పద్ధతి :

ముందుగా జీడిపప్పు, బాదం పప్పు పలుకుల్ని నేతిలో వేయించి పక్కన పెట్టుకోవాలి.
మిగిలిన అరకప్పు జీడిపప్పును ఇరవై నిముషాలు నీటిలో నానబెట్టుకొని పేస్ట్ లా చేసుకోవాలి.
మరో గిన్నెలో పాలను తీసుకొని పొయ్యి మీద పెట్టాలి. అవి మరిగాక చక్కెర వేయాలి. అది కరిగిందని నిర్ధారించుకున్నాక జీడిపప్పు మిశ్రమాన్ని వేయాలి. కొన్ని క్షణాలాగి పన్నీర్ తురుము వేయాలి. అది ఉడికాక యాలకుల పొడి వేయాలి. ముందుగా వేయించి పెట్టుకున్న జీడిపప్పు, బాదం పలుకుల్ని సగం వేసి, పొయ్యి కట్టేసి మిగిలిన వాటిని పైన అలంకరిచుకుంటే పాయసం చాలా రుచిగా ఉంటుంది.

మూలం : ఈనాడు వసుంధర

స్టఫ్ డ్ గులాబ్ జామ్

6/12/2013

కావలసిన పదార్థాలు :
బ్రెడ్ స్లైసెస్ - ఆరు
కోవా - 3 టేబుల్ స్పూన్లు
అన్ని రకాల డ్రై ఫ్రూట్స్ - 2 టేబుల్ స్పూన్లు
చక్కెర - ఒక టేబుల్ స్పూన్
యాలకుల పొడి - పావు చెంచా
నెయ్యి - వేయించడానికి సరిపడా
పాకం కోసం :
చక్కెర - కప్పు
నీళ్ళు - అరకప్పు

తయారుచేసే పద్ధతి :

ముందుగా చక్కెర పాకం చేసి పెట్టుకోవాలి. ఇందుకోసం ఒక గిన్నెలో నీళ్ళు, చక్కెర తీసుకొని పొయ్యి మీద పెట్టుకోవాలి. తీగ పాకం వచ్చాక పొయ్యి మీద నుండి దించాలి.
ఇప్పుడు బ్రెడ్ స్లైసుల అంచుల్ని తీసేసి ఒక్కోదానిపై కొద్దిగా నీళ్ళు చల్లి అప్పడాల కర్రతో వత్తినట్లు చేసి ఓ పక్కన పెట్టుకోవాలి.
మరో గిన్నెలో కోవా, డ్రై ఫ్రూట్స్ పలుకులు, చక్కెర, యాలకుల పొడి తీసుకొని చెంచ నీళ్ళు చల్లి పిండిలా కలిపి చిన్న చిన్న ఉండలుగా చేసుకోవాలి.
ఒక ఉండను తీసుకొని బ్రెడ్ స్లైసు మధ్యలో ఉంచి అంచుల్ని మూసేయాలి. ఆ తరువాత ఉండ వచ్చేలా చేత్తో గట్టిగా నొక్కినట్లు చేసుకోవాలి. అప్పుడే డ్రై ఫ్రూట్స్ మిశ్రమం బయటకు రాకుండా ఉంటుంది. ఇలా మిగిలిన స్లైసులను కూడా చేసుకోవాలి.
ఇప్పుడు బాణలిలో నెయ్యి వేడి చేసి ఒక్కో ఉండను వేయించి తీయాలి. కొద్దిగా వేడి తగ్గాక చక్కెర పాకంలో వేసి ఐదు నిమిషాలయ్యాక తీసేయాలి. నోట్లో వేసుకోగానే కరిగిపోయే స్టఫ్ డ్ గులాబ్ జామ్ రెడీ.

మూలం : ఈనాడు వసుంధర