Blog Archives - telugutaruni.weebly.com

గోధుమ రవ్వ పాయసం

5/27/2013

కావలసిన పదార్థాలు :

గోధుమ రవ్వ - ఒక కప్పు
స్వీట్ కార్న్ - ఒక కప్పు
పాలు - ఒక లీటర్
చక్కెర - 200 గ్రా.
నెయ్యి - అరకప్పు
బాదం, పిస్తాలు - పది
జీడిపప్పు - పది
యాలకుల పొడి - చిటికెడు

తయారుచేసే పద్ధతి :

గోధుమ రవ్వను నెయ్యిలో వేయించి పక్కకు పెట్టుకోవాలి. బాదం పిస్తాలను గంటసేపు నీటిలో నానబెట్టి తీసి తడి లేకుండా తుడిచి వేయించాక సన్నగా తరిగి పెట్టుకోవాలి. తర్వాత గిన్నెలో పాలు మరుగుతుండగా గోధుమ రవ్వ, చక్కెర, స్వీట్ కార్న్ వేసి పది నిమిషాల పాటు ఉడికించి అందులో తరిగిన బాదం, పిస్తా, జీడిపప్పు, యాలకులు, నెయ్యి కలిపి దించితే సరి. రుచికరమైన 'గోధుమ రవ్వ పాయసం' తయార్ !

మూలం : నమస్తే తెలంగాణ ఆదివారం పుస్తకం

పొట్లకాయ పాయసం

5/24/2013

కావలసిన పదార్థాలు :
పొట్లకాయ ముక్కలు - 2 కప్పులు (సన్నగా తరిగినవి)
బియ్యం - 1 కప్పు
నెయ్యి - 2 టీస్పూన్లు
పాలు - ఒక కప్పు
పంచదార - ఒక కప్పు
జీడిపప్పు, కిస్ మిస్ లు - సరిపడా (నేతిలో వేయించి పెట్టుకోవాలి)

తయారుచేసే పద్ధతి :

బియ్యాన్ని అరటీస్పూన్ నెయ్యిలో దోరగా వేయించి, గంట సేపు నానబెట్టుకోవాలి. తర్వాత నీళ్ళు వడకట్టి పేస్ట్ లా రుబ్బి, పాలు కలిపి పక్కనుంచాలి. పొట్లకాయ ముక్కల్ని ఆవిరిపై ఉడికించి, మిగిలిన నేతిలో కొద్దిసేపు వేయించి పాలమిశ్రమాన్ని పోసి బాగా కలుపుతూ పది నిమిషాలపాటు చిన్న మంటపై ఉడికించాలి. పంచదార వేసి కరిగిన తర్వాత సర్వింగ్ బౌల్ లోకి తీసుకొని జీడిపప్పు, కిస్ మిస్ లతో అలంకరించుకోవాలి.

పెసరపప్పు పాయసం

5/23/2013

కావలసిన పదార్థాలు :

పెసరపప్పు - ఒక గ్లాస్
నీళ్ళు - రెండు గ్లాసులు
పాలు - రెండు గ్లాసులు
పంచదార - అర గ్లాస్
యాలకులు - రెండు
జీడిపప్పు - కొంచెం
కిస్ మిస్ లు - కొంచెం
నెయ్యి - రెండు స్పూన్లు

తయారుచేసే పద్ధతి :

పెసరపప్పును నీళ్ళలో మెత్తగా ఉడికించాలి. బాగా ఉడికాక పాలు పోసి పంచదార వేసి సన్నని సెగపై ఉంచి కలుపుతూ ఉండాలి అది గరిట జారుగా అయినాక జీడిపప్పు కూడా కలపాలి. మీద నుంచి రెండు చెంచాల నెయ్యి వేయాలి. గరిట జారుగానే ఉంచాలి. తరువాత నేతిలో వేయించిన జీడిపప్పు, కిస్ మిస్ లు, యాలక్కాయ పొడి వేసి బాగా కలపాలి. ఇది పాయసంలాగా చాలా బాగుంటుంది. అమ్మవారి నైవేద్యానికి సులువైన వంటకం.

మూలం : ఆంద్రభూమి సచిత్ర మాస పత్రిక

గోధుమ బియ్యం పాయసం

5/23/2013

కావలసిన పదార్థాలు :

గోధుమ బియ్యం - ఒక గ్లాస్
నీళ్ళు - రెండు గ్లాసులు
పాలు - రెండు గ్లాసులు
పంచదార - ముప్పావు గ్లాస్
యాలకులు - రెండు
జీడిపప్పు - కొంచెం
కిస్ మిస్ లు - కొంచెం
నెయ్యి - రెండు స్పూన్లు

తయారుచేసే పద్ధతి :

గోధుమ బియ్యాన్ని నీళ్ళలో మెత్తగా ఉడికించాలి. బాగా ఉడికాక పాలు పోసి గరిట జారుగా ఆరనివ్వాలి. అప్పుడు పంచదార వెయ్యాలి. తరువాత నేతిలో వేయించిన జీడిపప్పు, కిస్ మిస్ లు, యాలక్కాయ పొడి వేసి బాగా కలపాలి. ఇది పాయసంలాగా చాల బాగుంటుంది. సాయి బాబాకి నైవేద్యముగా పెడితే చాలా బాగుంటుంది.

మూలం : ఆంద్రభూమి సచిత్ర మాస పత్రిక

జొన్న బనానా కేక్

5/23/2013

కావలసిన పదార్థాలు :

జొన్న పిండి - 150 గ్రా.
బేకింగ్ పౌడర్ - 2 స్పూన్లు
పంచదార పొడి - 70 గ్రా.
అరటి పండ్లు - 3
గుడ్లు - 3
డాల్డా - అరకప్పు
పాలు/పెరుగు - అరకప్పు
వెనిల్లా ఎసెన్స్ - కొద్దిగా
ఉప్పు - పావు స్పూన్
వంట సోడా - కొద్దిగా

తయారుచేసే పద్ధతి :

జొన్న పిండిలో బేకింగ్ పౌడర్, ఉప్పు, వంట సోడా కలపాలి. పంచదార పొడిలో కోడిగుడ్ల సొన, డాల్డా వేసి క్రీమ్ తయారయ్యేలా గిలక్కొట్టాలి. ఇందులోనే జొన్నపిండి మిశ్రమాన్ని చేర్చి బాగా కలపాలి. చివరగా పాలు/పెరుగు, అరటిపండు గుజ్జు కలపాలి. ఈ మిశ్రమాన్ని నెయ్యి రాసిన కేక్ గిన్నెలో వేసి ఓవెన్ లో అరగంట సేపు బేక్ చేయాలి. చల్లారిన తర్వాత ముక్కలు చేస్తే చాలు.

మూలం : ప్రజా శక్తి ఆదివారం

పైనాపిల్ కేక్

5/23/2013

కావలసిన పదార్థాలు :

బ్రౌన్ షుగర్ (ముడి పంచదార ) - పావు కప్పు
మైదా - ఒకటిన్నర కప్పు
బేకింగ్ పౌడర్ - 1 స్పూన్
బేకింగ్ సోడా - 1 స్పూన్
తేనె - ముప్పావు కప్పు
చీజ్ - ముప్పావు కప్పు
నిమ్మరసం - 2 టేబుల్ స్పూన్లు
ఆరెంజ్ తొక్కల రసం - 1 స్పూన్
పైనాపిల్ ముక్కలు - 20

తయారుచేసే పద్ధతి :

అయిదారు పైనాపిల్ ముక్కలు ఉంచి మిగిలిన ముక్కలను జ్యూస్ చేసి పెట్టుకోవాలి. మైదాలో బేకింగ్ పౌడర్, బేకింగ్ సోడా, ఉప్పు కలపాలి. మరో గిన్నెలో నెయ్యి, తేనె, చీజ్, పైనాపిల్ జ్యూస్, నిమ్మరసం, ఆరెంజ్ తొక్కల తురుము వేసి గిలక్కొట్టాలి. ఈ గుడ్డు మిశ్రమం మొత్తాన్ని మైదా మిశ్రమం లో కలపాలి. కేక్ బాక్స్ లో అడుగున పైనాపిల్ ముక్కలు పేర్చాలి. దానిమీద జాగ్రత్తగా కేక్ మిశ్రమాన్ని వేయాలి. ఈ పాత్రని ఓవెన్ లో అరగంట బేక్ చేయాలి. కేక్ గోధుమ రంగులోకి మారాక ఓవెన్ లో నుండి బయటకి తీయొచ్చు. చల్లారిన తర్వాత కేక్ బాక్సును ప్లేటు మీద బోర్లించి ముక్కలు కోయాలి. పిల్లలు పైనాపిల్ కేక్ ను బాగా ఇష్టపడతారు.

మూలం : ప్రజా శక్తి ఆదివారం

హనీ కేక్

5/23/2013

కావలసిన పదార్థాలు :

తేనె - పావు లీటర్
వెన్న - అరకప్పు
ఆరెంజ్ పీల్ - 1 స్పూన్ (కమలా తొక్కల తురుము )
కోడిగుడ్లు - 3
ఆరెంజ్ జ్యూస్ - పావు లీటర్
మైదా - పావుకిలో
బేకింగ్ పౌడర్ - 3 స్పూన్లు
బేకింగ్ సోడా - అర స్పూన్
ఉప్పు - అర స్పూన్
దాల్చిన చెక్క పొడి - 1 స్పూన్
బాదం పొడి - అరకప్పు
తేనె - మరో అరకప్పు

తయారుచేసే పద్ధతి :

మైదాలో బేకింగ్ పౌడర్, బేకింగ్ సోడా, ఉప్పు, దాల్చిన చెక్క పొడి కలపాలి. మరో గిన్నెలో కోడిగుడ్ల సొన, తేనె బాగా గిలక్కొట్టి ఉంచాలి. అందులో బాదం పొడి కలిపి ఈ మొత్తాన్ని మైదా మిశ్రమంలో కలపాలి. ముందుగానే ఓవెన్ ను 180 డిగ్రీల సెంటీ గ్రేడ్ దగ్గర వేడి చేసి ఉంచుకోవాలి. కేక్ బాక్సుకి నెయ్యి రాసి మైదాపిండి చల్లి పెట్టుకోవాలి. ఇందులో ముందుగా కలిపి పెట్టుకున్న కేక్ మిశ్రమాన్ని వేసి ఓవెన్ లో పెట్టి ముప్పావు గంట సేపు బేక్ చేయాలి. చల్లారిన తర్వాత ముక్కలు కోసి పైన అరకప్పు తేనె పోస్తే చాలు. హనీ కేక్ రెడీ ...

మూలం : ప్రజా శక్తి ఆదివారం

చాక్లెట్ కేక్

5/23/2013

కావలసిన పదార్థాలు :

మైదా - 250 గ్రా.
గుడ్లు - 3
కోకో పౌడర్ - 3 స్పూన్లు
వెన్న - 200 గ్రా.
పంచదార - 200 గ్రా.
బేకింగ్ పౌడర్ - 2 స్పూన్లు
డార్క్ చాక్లెట్ - 1
వాల్ నట్ పలుకులు - 2 స్పూన్లు

తయారుచేసే పద్ధతి :

మైదాలో బేకింగ్ పౌడర్ ,కోకో పౌడర్ కలపాలి. డార్క్ చాక్లెట్ సన్నగా తురిమి మైదా మిశ్రమంలో వేయాలి. పంచదార పొడి, వెన్న, కోడిగుడ్లను ఓ పాత్రలో తీసుకొని బాగా గిలక్కొట్టాలి. అందులో మైదా మిశ్రమం వేసి మరో ఐదు నిముషాలు కలపాలి. చివర్లో వాల్ నట్ పలుకులు చేర్చాలి. ఇప్పుడు ఓవెన్ ను 130 డిగ్రీల వేడిలో ముందుగా సిద్దం చేసుకోవాలి. కేక్ పాత్రకు వెన్న రాసి ఈ మిశ్రమాన్ని అందులో వేసి ఇరవై నిముషాలు ఉడికించి తీస్తే సరిపోతుంది.

మూలం : ప్రజా శక్తి ఆదివారం

ప్లమ్ కేక్

5/23/2013

కావలసిన పదార్థాలు :

రైసిన్స్ (కిస్ మిస్ లాగే పెద్దగా ఉండేవి)-50 గ్రా.
చెర్రీలు - 50 గ్రా.
ఆరెంజ్ పీల్ - 25 గ్రా.(ఎండిన కమలా తొక్కల తురుము)
ఎండు ఖర్జూరాలు - 50 గ్రా.
కిస్ మిస్ - 50 గ్రా.
బటర్ లేక వెన్న - 125 గ్రా.
పంచదార - 125 గ్రా.
మైదా - 125 గ్రా.
గుడ్లు - 2
కమలా రసం - 1 కాయ
బేకింగ్ పౌడర్ - అరటీస్పూన్
వెనిల్లా - అర స్పూన్
కేరమెల్ సిరప్ - అర స్పూన్
శొంటి, చెక్క, లవంగం పొడి - పావు టీస్పూన్

తయారుచేసే పద్ధతి :

కేరమెల్ సిరప్ తయారీకి :

పావుకప్పు పంచదార, 1 టేబుల్ స్పూన్ నీళ్ళు కలిపి పొయ్యి మీద పెట్టి తిప్పుతూ ఉండాలి. అది బ్రౌన్ కలర్ లోకి మారి చిక్కబడ్డాక పావుకప్పు మరిగించిన నీటిని కలిపితే కేరమెల్ తయారవుతుంది.

కమలారసంలో డ్రై ఫ్రూట్స్ అన్ని కలిపి వారం పాటు అలాగే ఉంచాలి.
ముందుగా వెన్న/బటర్ లో గుడ్లు కలిపి బాగా కలియబెట్టాలి. తరువాత పంచదార కలపాలి. ఆ మిశ్రమానికి కేరమెల్, వెనిల్లా, ఎసైన్స్, శొంటి, లవంగం పొడి వరుసగా కలపాలి. మైదా, బేకింగ్ పౌడర్ కలిపి జల్లించాలి. ఈ మిశ్రమానికి డ్రై ఫ్రూట్స్ అన్ని కలపాలి. దీన్ని గుడ్లు, కేరమెల్ మిశ్రమంలో కలపాలి. ఈ మొత్తాన్ని నెయ్యి రాసి మైదా చల్లిన కేక్ ట్రేలో వేయాలి. 180 డిగ్రీ సెంటిగ్రేడ్ లో ఒక గంట బేక్ చేయాలి. అంతే నోరూరించే ప్లమ్ కేక్ రెడీ...

మూలం : ప్రజా శక్తి ఆదివారం

గవ్వలు

5/20/2013

కావలసిన పదార్థాలు :

గోధుమ పిండి : పావుకిలో
బెల్లం : పావుకిలో
నూనె : పావుకిలో
ఉప్పు : తగినంత

తయారుచేసే పద్ధతి :

గోధుమ పిండిలో ఉప్పు వేసి పూరీ పిండి మాదిరిగా కలిపి ఒక గంట నాననివ్వాలి. అంతలో ఒక గిన్నెలో బెల్లం, కొన్ని నీళ్ళు పోసి పాకం పట్టుకోవాలి. గవ్వలు తయారుచేసే స్పూన్ లేదా పీటపై గోలి సైజ్ పిండి తీసుకొని గవ్వలుగా చేసుకోవాలి. మూకుట్లో నూనె కాగాక గవ్వలు కొన్ని వేసుకొని ఎర్రగా వేయించి చల్లారక బెల్లం పాకంలో వేసుకుంటే సరి.

మూలం : ఆదివారం ఆంధ్రప్రభ